"Waxa uu soo bandhigayaa fawdo iyo qabado jira waase sheeko caqligala oo xiiso badan."
Waxaa la soo saarey filim cusub oo British-Somali ah oo lagu magacaabo Muna, kaasoo hadda laga daawan karaa BBC iPlayer, islamarkaana si weyn ayaa looga amaanay filimka gudaha iyo dibaddaba.
Filimkan oo soconaya 18 daqiiqo, waxaa jilaya Kosar Ali, oo hore loogu xushay abaalmarinta BAFTA filimka Rocks, waxaana agaasintii iska leh Warda Mohamed – haweeney Soomaali ah oo hore u agaasintay riwaayaddii caanka noqotay Dugsi Dayz.
Sheekadu waxay ka hadlayaa:
-
Gabar yar oo la tacaalaysa geerida awoowgeed – in kastoo aysan waligeed arag.
-
Xiriir adag oo kala dhexeeya hooyadeed.
-
Murugo, qoys, dhaqan, iyo su’aalo la xiriira aqoonsiga dhalinyarada British-Somali-ga.
Warda Mohamed, agaasimaha filimka, waxay sheegtay in sheekadu ka timid dareen dhab ah oo ay iyadu soo martay carruurnimadeedii, iyadoo tiri:
"Murugada xal ma leh, waa in lala noolaadaa, la dareemaa, si tartiib ah."
Filimku wuxuu jebinayaa sawirradii qaloocnaa ee laga bixin jiray dadka Soomaaliyeed ee ku jira filimada reer galbeedka. Warda waxay leedahay:
"Waa waqtigii la muujin lahaa quruxda iyo hodantinimada dadka Soomaaliyeed ee ku nool Britain."
Kosar Ali iyaduna waxay sheegtay:
"Mar walba waan aqbalaa sheekooyinka Soomaaliyeed marka la ii soo bandhigo, sababtoo ah aad bay u yartahay."
Duubista filimka ayaa qayb ahaan ka dhacday gudaha Soomaaliya, iyadoo laga qeybgeliyay muusikiiste ka yimid Muqdisho si loo helo codka cuudka – muusig dhaqameed Soomaaliyeed. Warda waxay ku tilmaantay:
"Duubista Soomaaliya waxay ahayd fowdo... laakiin waa fowdo qurux badan."
Muusigga filimka wuxuu isku darayaa heeso casri ah oo UK ah iyo kuwa dhaqanka Soomaaliyeed – waxaana liiska heesaha u sameysay Muna lafteeda oo qayb ka ah sheekada.
Caqabadaha ugu waa weyn waxay ahaayeen:
-
Helidda jilayaal Soomaali ah oo u qalma doorka.
-
Faham la’aanta hay’adaha maalgelinta ee ku aadan sheekooyinka Soomaalida.
Warda waxay tilmaamtay in maalgelinta filimkan ay qaadatay afar sano, iyadoo la kulantay dad badan oo aan fahmin muhiimadda sheekada. Waxay tiri:
"Dad badan waxay rabaan in la arko aaska iyo baroor-diiqda, aniguna waxaan rabay in la arko qalbiga murugaysan ee gabar yar."
Filimkan oo abaalmarinno badan ku guuleystay, haatan waxaa laga heli karaa barta BBC iPlayer, waxaana bulshada Soomaaliyeed loogu baaqayaa in ay daawato, taageertana. Warda waxay soo gabagabaysay hadalkeedii iyadoo tiri:
"Waa inaan sii wadnaa qorista, jilista, iyo sheeko keenista – si dunidu noogu aragto sida aan rabno in naloo arko."
Waa warbixin uu soo tebiyay Radio Hormuud.