Laas-caanood(RH):-Waxaa maalintii labaad dagaal xoogani ka socdaa gudaha magaalada laas-caanood ee Xarunta gobolka sool dagaalkaasi oo u dhexeeya ciidamada qaranka Somaliland iyo Ciidamada jabhada SSC oo ay garabsiinayaan ciidamda maamulka Puntland dagaalkaasi oo sababay khasaare dhimasho iyo dhaawacba leh.
Xukuumada Somaliland oo dagaalkaasi war ka soo saartey ayaa sheegtey in Saaka 5:30 Subaxnimo la soo wareeraray Fadhiisimada Ciidanka Qaranka Somaliland ee Magaalada Laascaanood,kuwaasi oo ay weerarka soo Weerareen Ciidamada Maamulka Putland, iyo jabhada Khaatumo.
Qoraalkan Ka Soo Baxay Wasaaradda Arrimaha Gudaha Somaliland ayaa u dhignaa sidan;-Waxaa Saaka 5:30 Subaxnimo marlabaad soo wareeraray Fadhiisimada Ciidanka Qaranka Jamhuuriyadda Somaliland ee Magaalada Laascaanood kooxo argagixiso ah, kuwaasoo ah kooxihii shalay subax wareerka ku soo qaaday Ciidamada Qaranka iyo Xarunta Golaha Wasiirada.
Kooxahan Argagixisada ah ee saaka soo wareeraray Fadhiisimada Ciidanka Qaranka, waxaa taageeraya Ciidamo ka soo tallaabay Maamulka Putland, kuwaasoo si toosa ugu jira dagaalka saaka, waxaa kale oo iyana dagaalka qayb ka ah Ciidamada la baxay Khaatumo.
Waxaanu u sheegaynaa Beesha Caalamka, wadamada Jaarka ah, Midawga Africa, Urur Gobeedka IGAD, Qaramada Midoobay iyo Jaamacada Carabka in dagaalka Laascaanood ay iska kaashadeen kooxo argagixiso ah iyo Maamulka Putland oo si aan gabasho lahayn dagaalka ugu jira.
Dowladda Jamhuuriyadda Somaliland waxay ku suntan tahay nabad iyo horuumar, waxayna ku jirtaa is difaac iyo in ay shacabkeeda ka difaacdo cadawga ku soo duulay.
Waxaa kale oo aanu Beesha Caalamka la socodsiinaynaa iyo Shacabka Somalilandba in Maamulka Putland dagaal ka abaabulayo Garoowe, iyagoo qorshanaya in ay soo weeraraan fadhiisimada Ciidamada Qaranka Jamhuuriyadda Somaliland ee Jiida hore, waxayna Ciidanka Qaranku diyaar u yihiin is difaac.